Сустрэча, у час якой прэзентавалася канцэпцыя стварэння УЗВ, адбылася 3 ліпеня ў Музэі Салідарнасці. Удзел у ёй брала каля 20 цікавых і апантаных людзей самага рознага ўзросту.
Гданьск стаў ужо трэцім горадам, куды завіталі ініцыятары стварэння Універсітэта і ў кожным горадзе былі свая атмасфера і спецыфіка.
У Гданьску было шмат людзей “залатога ўзросту”. Усе яны апынуліся тут у розны час і з розных прычын.
Ідэя па стварэнні УЗВ была ўспрынятая вельмі цёпла і на нашых вачах “абрастала” ініцыятывамі:
– я магу праводзіць экскурсіі і падарожжы
– я магу зарганізаваць хор і рабіць артэрапеўтычныя заняткі
– я магу быць арганізатаркай – магу шукаць людзей/памяшканні
– я магу праводзіць курс па стварэнні анімаваных фільмаў (на аснове персанальных гісторый).
Таксама на сустрэчы прагучалі шмат няпростых персанальных гісторый пра тое, з чым прыходзіцца сутыкацца чалавеку пенсійнага ўзросту, які вымушана апынуўся ў іншай краіне і не мае магчымасці перааформіць пенсію, знайсці годную працу.
Гучалі прапановы больш увагі звяртаць на адстойванне правоў людей сталага ўзросту, якія зараз знаходзяцца ў Польшчы – дапамагаць з працаўладкаваннем, прававымі і псіхалагічнымі кансультацыямі.
Наперадзе яшчэ сустрэча з патэнцыйнымі студэнтамі і выкладчыкамі пляцоўкі УЗВ у Варшаве, якая адбудзецца 19 ліпеня.
А ў жніўні самыя актыўныя ўдзельнікі і ўдзельніцы сустрэч у Вроцлаве, Беластоку, Гданьску і Варшаве будуць запрошаныя на Акадэмію Лідэраў Залатога Веку.
Там яны змогуць пазнаёміцца з цікавым польскім досведам актывізацыі сталых людзей, развіць свае лідэрскія кампетэнцыі, распрацаваць дэталёвыя планы працы пляцовак УЗВ у сваіх гарадах, каб ужо ўвосень правесці там першыя заняткі.
Сустрэча ў Гданьску праходзіла ў межах праекта, дафінансаванага са сродкаў Polsko-Amerykańska Fundacja Wolności у межах праграмы “RITA – Przemiany w regionie”, якую рэалізуе Fundacja Edukacja dla Demokracji.
Дзякуй за падтрымку!