Каля 40 чалавек з розных гарадоў Польшчы ўзялі ўдзел у арыентацыйнай анлайн сустрэчы выкладчыкаў Беларускага Універсітэту Залатога Веку.
Заяўкі на выкладанне ў першым сезону УЗВ падалі 69 чалавек. Большасць з іх атрымалі запрашэнне да супрацы.
У час сустрэчы, якая прайшла 4 лістапада, былі прадстаўленыя канцэпцыя праграмы, вынікі ўжо зробленай працы і найбліжэйшыя задачы па арганізацыі працы Універсітэта.
«Засноўваем супольнасць, якая стварае сэнсы” – такую місію “Універсітэта Залатога Веку” агучыла на сустрэчы адна з яго стваральніц Лана Руднік.
– Я вельмі доўга “выношваю” адказ на пытанне “навошта”? І зусім нядаўна зразумела найбольш важную, ключавую ідэю, якая можа быць сэрцам нашага УЗВ. Ствараць цёплую, утульную супольнасць для тых, каму самотна, каму незнаёма, каму няўтульна ў новых абставінах. Супольнасць людзей, якія будуць гатовыя навучаць і навучацца, засвойваць новыя і карысныя кампетэнцыі, супольнась, якая будзе даваць сілы і сэнсы.
Так, страшна. Мы ступаем на незнаёмую глебу. Як і калісьці, 16 год таму, калі мы пачыналі стварэнне першага такога Універсітэта ў Беларусі.
Пачыналі з вялікім энтузіязмам, надзеямі палепшыць якасць жыцця сталых людзей, стварыць праграму, якая б магла падтрымаць іх, зрабіць іх жыццё напоўненым і цікавым.
І зараз мы ізнову пачынаем. Пачынаем з вялікай каманды валанцёраў, гатовых спрычыніцца да такой выдатнай справы! Канечне, перажываем, што не атрымаецца, як мы задумалі. Але мы паспрабуем.
Што будзе адбывацца далей?
Да сярэдзіны лістапада выкладчыкі будуць рыхтаваць планы і анонсы сваіх будучых курсаў, а ўжо ў снежні пачнецца запіс студэнтаў.
Першы сезон УЗВ распачнецца ў сярэдзіне студзеня і будзе працягвацца чатыры месяцы.
Заняткі Універсітэта будуць праходзіць у Беластоку, Варшаве, Вроцлаве і Гданьску.